ڪراچي ….. ڪراچي ۾ فائرنگ جو سلسلو جاري نه رڪي سگهيو اڄ به ڪراچي جي مختلف علائقن ۾ فائرنگ ۽ پرتشدد واقعن ۾ 10 ڄڻا مارجي ويا آهن، جڏهن ته هڪ اهلڪار به زخمي ٿي پيو آهي. رپورٽ موجب ناظم آباد نمبر 2 واري علائقي ۾ هٿياربندن جي فائرنگ ۾ 3 ڄڻا مارجي ويا، ٻڌايو پيو وڃي ته ناظم آباد واري علائقي ۾ گول مارڪيٽ جي هڪ جنرل اسٽور تي هٿياربندن فائرنگ ڪري ڏني جنهن جي نتيجي ۾ 3 ڄڻا زخمي ٿي پيا زخمين کي اسپتال منتقل ڪيو ويو جتي زخمن جا سور نه سهندي ٽئي زخمي قمر، سيد حسنين، محمد حسين فوت ٿي ويا، قمر، محمد حسين ۽ سيد حسنين سڳا ڀائر ٻڌايا پيا وڃن. واقعي کان پوءِ علائقي ۾ ڇڪتاڻ پکيڙجي وئي ۽ دڪان، ڪاروبار بند ٿي ويو. هوڏانهن چورنگي وٽ به هٿياربندن هٿان 2 ڄڻا مارجي ويا آهن ٻئي پاسي ڪراچي جي ايوب ڳوٺ واري علائقي ۾ هڪ ڄڻي کي قتل ڪيو ويو آهي پوليس موجب اڻڄاتل هٿياربندن فائرنگ ڪري هڪ ڄڻي کي قتل ڪري ڇڏيو جڏهن ته فائرنگ ۾ هڪ ڄڻو زخمي به ٿيو آهي، واقعي بعد علائقي ۾ ڇڪتاڻ پکڙجي وئي پوليس موجب واقعو ذاتي دشمني جو نتيجو آهي هوڏانهن ڪراچي جي قائد آباد واري علائقي ۾ بم ڌماڪو ٿيو جنهن سان ڪو جاني نقصان ناهي ٿيو ٻڌايو پيو وڃي ته قائد آباد واري علائقي مظفر آباد ڪالوني ۾ هڪ گند ڪچري جي ڍير ۾ پوريل بم ڦاٽي پيو هوڏانهن نيو ڪراچي ۾ انڊا موڙ وٽ هٿياربندن جي فائرنگ ۾ هڪ ڄڻو مارجي ويو جڏهن ته نيو ڪراچي جي ئي علائقي ڪريلا اسٽاپ وٽ به هٿياربندن هٿان هڪ ڄڻو قتل ٿي ويو آهي، ٻئي طرف ڪراچي جي ماڙيپور ۽ مڇرڪالوني وارن علائقن ۾ به هٿياربندن ٻن ڄڻن کي قتل ڪري ڇڏيو آهي، سهراب ڳوٺ واري علائقي ۾ به هٿياربندن هوٽل تي فائرنگ ڪري هڪ ڄڻي کي قتل ڪري ڇڏيو، مارجي ويل جي سڃاڻپ زوهيب نالي سان ڪئي وئي آهي.
